احياء الاعتصام

مكنتش متواجد امبارح في سعد  واما رحت النهاردة لقيت العدد اللي كان قليل قل زيادة بسبب التعليق اللي حصل
فيه افكار سبق شرحها في تدوينة سابقة في نهاية الاسبوع الاول للاعتصام واتكلمت فيها مع معتصمين رغم انها كانت مقترحات بديهية ومفيدة في الوقت ده محدش اهتم بها معرفش ليه يمكن عشان انا مشاركتي في الاعتصام اقل من ناس كتير او ايا كان السبب

 النهاردة على الساعة 6 وقفت اخت شهيد وبدأت تهتف بهتافات ضد العسكر والمشير يمكن كانت اشد شوية من الهتافات المعتادة وفيه جرافيتي اترسم ع الارض ضد حكم العسكر كل دي حاجات كويسة ومقتنعين بها كمشاركين بس انا لو عايز اجذب ناس من برة لا يمكن اجذبهم كدة وطبعا مش حقدر الوم على اهالي الشهداء بسبب غضبهم وقلبت العملية بزعيق ونرفزة وافقدت بعض التعاطف اللي اساسا مفقود وده انطباع لقيته عند اكتر من واحد لما اتجهت عند السور للكلام مع الناس برة لحد قبل ما امشي بشوية

راجل كبير كان بيحاول يوعي الناس بس للاسف بطريقة غلط مينفعش انا اكلم اللي برة المؤيد او اللي مصدق المجلس العسكري بنفس المنطق اللي بتكلم بيه مع اللي جوة الاعتصام اللي موقفه مخالف تماما لموقف اللي برة انا كدة بنفره مني مش بجذبه ليا

المهم ان كان فيه واحد واقف على السور جمبي واتكلمت معاه بعدها تقريبا لمدة ساعة ...شاب بسيط جدا واضح انه بيشتغل بصنعة او حرفة وزي ما قال لي انه يوم بيشتغل وعشرة لأ ...لا يملك كومبيوتر ولكن من قعدته في السايبرات بيحاول نشر أفكاره  على صفحات الفيس بوك ولا حياة لمن تنادي برضه ...الشاب ده فاهم جدا سياسيا وطرح برضه افكار على معتصمين منهم التويبس وبيقول ان الكلام دخل من ودن وطلع من التانية...الحمد لله احنا كلنا في مستوى كويس ماديا ولما شاركنا في الثورة شاركنا واحنا اقل احتياجا من الشاب ده ...اغلبنا الحمد لله ممكن يلاقي شغلة كويسة وحياة كريمة بسهولة وكانت مطالبنا الشخصية خاصة بالحرية والديمقراطية والكرامة انما الشاب ده بيدور على المتطلبات المادية او الحياة الكريمة بالاضافة لباقي المطالب السابقة فمفيهاش حاجة اننا نسمع الناس كلها

في خلال الوقت اللي اتكلمت فيه مع الشاب ده وصلنا لكذا حاجة اولا محدش عارف راحت فين اللجان التنظيمية للاعتصام اللي كانت بتتنظم من كام يوم خصوصا لجان التوعية السياسية واللجان الشعبية

ثانيا محاكمة مبارك يمكن ان تستغل الاستغلال الامثل لو مبارك مظهرش وده الاحتمال الاكبر جرافيتي ...ستنسيل ...منشورات  في كل حتة...فيديوهات مبسطة على يوتيوب انما لو المفاجاة حصلت وظهر حتكون نقطة سلبية لنا ...معرفش ممكن وقتها نعمل ايه ومحتاجة تفكير سريع 
بالاضافة لمحاولة تكرار نفس افكار الجرافيتي والمنشورات والستنسيل في تعريف الناس بالشباب المعتقلين في احداث المنطقة الشمالية
العملية محتاجة شغل دعاية زي بتاع خالد سعيد

ثالثا : بس دي محتاجة لشغل  تنسيقي كبير مع التحرير وباقي المحافظات :خلق وتصعيد كوادر جديدة قادرة على كسب الراي العام بدل النخبة السياسية اللي باعت القضية واللعب بنفس طريقة وطرح الاخوان والسلف والمجلس والحكومة :انتخابات ثم اعداد لدستور ثم رئيس ثم دستور مع التوضيح للراي العام ان فيه طلاسم كتير في الاعلان الدستوري وقوانين الانتخابات وخلافه ممكن تستغل لاطالة الفترة
"الانتقالية"
زي مثلا  هل الجمعية التاسيسية من جوة البرلمان ولا من برة ؟
طب ولو من جوة كيفية انتخابها ؟ طب ولو من برة مين حيتقدملها ؟؟
لو حيتعمل مبادئ فوق دستورية مين حيعملها ؟؟

متنسوش ان وقتها المفروض يكون فيه مجلس شعب يعني هو اللي يعمل مشاريع القوانين دي ويناقشها وكل ده 

بيطيل الفترة

ومتنسوش خطاب الفنجري : التزام المجلس الاعلى  باجراء انتخابات برلمانية ثم اعداد دستور ثم انتخابات رئيسية
الله دي العملية حتطول ...والكلام ده يختلف عن الاعلان الدستوري ...طب متحطش تعديل ليه للاعلان الدستوري بالنسبة للنقطة دي ونوضح الموضوع ...طب تصريحات الرويني : المجلس الاعلي يستمد شرعيته من كونه جهة سيادية وليس من شرعية الثورة ...عكس ما اتعلن بعد التنحي
كل دي اسئلة  تتوجه للراي العام ع الاسوار وفي الشارع و ع القهاوي وبالنقاش او بالملصقات او يوتيوب او غيره
اظن وقتها فرصتنا في كسب الراي العام اللي شايف انها كلها 3 او 4 شهور ونخلص والمفروض نصبر حيتحول لما يشوف الاسئلة دي كلها قدامه وحيبقى في صفنا وحيجبر القوى السياسية بل الاخوان والسلفيين انهم ييجو في ملعبنا احنا تاني وترجع الثورة يحركها الشارع الغير مسيس من جديد

كلامي موجه للتويبس المعتصمين في الفترة دي لانهم على ما اظن اكتر عدد موجود بيجمعهم خيمة واحدة و طريقة تفكير واحدة ومنهم بعض الناس شغالين سياسة من قبل الثورة وبالتالي الموضوع حيبقى اسهل  كتيم وورك

ملحوظات اخيرة: 1-الاعتصام جاب اخره سياسيا وكل الليلة اللي موجودة دعم معنوي لاهالي الشهداء والمصابين والمعتقلين
فمينفعش يستمر بالطريقة دي وبس

2 -محتاجين دلوقتي نلعب سياسة عشان تقدر ترجع  الحشد والمد الثوري تاني

3- محتاجين اي اختراع يلم عدد في الميدان في رمضان بس لحد دلوقتي مش لاقي فكرة فياريت اللي عنده اقتراح يبدأ ينفذه

اللي عايز يناقشني يمنشنني او انا موجود في الميدان اغلب وقتي عند الاسوار وسحنتي اهي منورة في الافاتار بتاعي

واسف للاطالة