احياء الاعتصام

مكنتش متواجد امبارح في سعد  واما رحت النهاردة لقيت العدد اللي كان قليل قل زيادة بسبب التعليق اللي حصل
فيه افكار سبق شرحها في تدوينة سابقة في نهاية الاسبوع الاول للاعتصام واتكلمت فيها مع معتصمين رغم انها كانت مقترحات بديهية ومفيدة في الوقت ده محدش اهتم بها معرفش ليه يمكن عشان انا مشاركتي في الاعتصام اقل من ناس كتير او ايا كان السبب

 النهاردة على الساعة 6 وقفت اخت شهيد وبدأت تهتف بهتافات ضد العسكر والمشير يمكن كانت اشد شوية من الهتافات المعتادة وفيه جرافيتي اترسم ع الارض ضد حكم العسكر كل دي حاجات كويسة ومقتنعين بها كمشاركين بس انا لو عايز اجذب ناس من برة لا يمكن اجذبهم كدة وطبعا مش حقدر الوم على اهالي الشهداء بسبب غضبهم وقلبت العملية بزعيق ونرفزة وافقدت بعض التعاطف اللي اساسا مفقود وده انطباع لقيته عند اكتر من واحد لما اتجهت عند السور للكلام مع الناس برة لحد قبل ما امشي بشوية

راجل كبير كان بيحاول يوعي الناس بس للاسف بطريقة غلط مينفعش انا اكلم اللي برة المؤيد او اللي مصدق المجلس العسكري بنفس المنطق اللي بتكلم بيه مع اللي جوة الاعتصام اللي موقفه مخالف تماما لموقف اللي برة انا كدة بنفره مني مش بجذبه ليا

المهم ان كان فيه واحد واقف على السور جمبي واتكلمت معاه بعدها تقريبا لمدة ساعة ...شاب بسيط جدا واضح انه بيشتغل بصنعة او حرفة وزي ما قال لي انه يوم بيشتغل وعشرة لأ ...لا يملك كومبيوتر ولكن من قعدته في السايبرات بيحاول نشر أفكاره  على صفحات الفيس بوك ولا حياة لمن تنادي برضه ...الشاب ده فاهم جدا سياسيا وطرح برضه افكار على معتصمين منهم التويبس وبيقول ان الكلام دخل من ودن وطلع من التانية...الحمد لله احنا كلنا في مستوى كويس ماديا ولما شاركنا في الثورة شاركنا واحنا اقل احتياجا من الشاب ده ...اغلبنا الحمد لله ممكن يلاقي شغلة كويسة وحياة كريمة بسهولة وكانت مطالبنا الشخصية خاصة بالحرية والديمقراطية والكرامة انما الشاب ده بيدور على المتطلبات المادية او الحياة الكريمة بالاضافة لباقي المطالب السابقة فمفيهاش حاجة اننا نسمع الناس كلها

في خلال الوقت اللي اتكلمت فيه مع الشاب ده وصلنا لكذا حاجة اولا محدش عارف راحت فين اللجان التنظيمية للاعتصام اللي كانت بتتنظم من كام يوم خصوصا لجان التوعية السياسية واللجان الشعبية

ثانيا محاكمة مبارك يمكن ان تستغل الاستغلال الامثل لو مبارك مظهرش وده الاحتمال الاكبر جرافيتي ...ستنسيل ...منشورات  في كل حتة...فيديوهات مبسطة على يوتيوب انما لو المفاجاة حصلت وظهر حتكون نقطة سلبية لنا ...معرفش ممكن وقتها نعمل ايه ومحتاجة تفكير سريع 
بالاضافة لمحاولة تكرار نفس افكار الجرافيتي والمنشورات والستنسيل في تعريف الناس بالشباب المعتقلين في احداث المنطقة الشمالية
العملية محتاجة شغل دعاية زي بتاع خالد سعيد

ثالثا : بس دي محتاجة لشغل  تنسيقي كبير مع التحرير وباقي المحافظات :خلق وتصعيد كوادر جديدة قادرة على كسب الراي العام بدل النخبة السياسية اللي باعت القضية واللعب بنفس طريقة وطرح الاخوان والسلف والمجلس والحكومة :انتخابات ثم اعداد لدستور ثم رئيس ثم دستور مع التوضيح للراي العام ان فيه طلاسم كتير في الاعلان الدستوري وقوانين الانتخابات وخلافه ممكن تستغل لاطالة الفترة
"الانتقالية"
زي مثلا  هل الجمعية التاسيسية من جوة البرلمان ولا من برة ؟
طب ولو من جوة كيفية انتخابها ؟ طب ولو من برة مين حيتقدملها ؟؟
لو حيتعمل مبادئ فوق دستورية مين حيعملها ؟؟

متنسوش ان وقتها المفروض يكون فيه مجلس شعب يعني هو اللي يعمل مشاريع القوانين دي ويناقشها وكل ده 

بيطيل الفترة

ومتنسوش خطاب الفنجري : التزام المجلس الاعلى  باجراء انتخابات برلمانية ثم اعداد دستور ثم انتخابات رئيسية
الله دي العملية حتطول ...والكلام ده يختلف عن الاعلان الدستوري ...طب متحطش تعديل ليه للاعلان الدستوري بالنسبة للنقطة دي ونوضح الموضوع ...طب تصريحات الرويني : المجلس الاعلي يستمد شرعيته من كونه جهة سيادية وليس من شرعية الثورة ...عكس ما اتعلن بعد التنحي
كل دي اسئلة  تتوجه للراي العام ع الاسوار وفي الشارع و ع القهاوي وبالنقاش او بالملصقات او يوتيوب او غيره
اظن وقتها فرصتنا في كسب الراي العام اللي شايف انها كلها 3 او 4 شهور ونخلص والمفروض نصبر حيتحول لما يشوف الاسئلة دي كلها قدامه وحيبقى في صفنا وحيجبر القوى السياسية بل الاخوان والسلفيين انهم ييجو في ملعبنا احنا تاني وترجع الثورة يحركها الشارع الغير مسيس من جديد

كلامي موجه للتويبس المعتصمين في الفترة دي لانهم على ما اظن اكتر عدد موجود بيجمعهم خيمة واحدة و طريقة تفكير واحدة ومنهم بعض الناس شغالين سياسة من قبل الثورة وبالتالي الموضوع حيبقى اسهل  كتيم وورك

ملحوظات اخيرة: 1-الاعتصام جاب اخره سياسيا وكل الليلة اللي موجودة دعم معنوي لاهالي الشهداء والمصابين والمعتقلين
فمينفعش يستمر بالطريقة دي وبس

2 -محتاجين دلوقتي نلعب سياسة عشان تقدر ترجع  الحشد والمد الثوري تاني

3- محتاجين اي اختراع يلم عدد في الميدان في رمضان بس لحد دلوقتي مش لاقي فكرة فياريت اللي عنده اقتراح يبدأ ينفذه

اللي عايز يناقشني يمنشنني او انا موجود في الميدان اغلب وقتي عند الاسوار وسحنتي اهي منورة في الافاتار بتاعي

واسف للاطالة 

بالنسبة لامنجية سعد زغلول

واحد اعرفه بس مش معرفة قوية وبالتالي غير موثوق في كلامه عضو في المصريين الاحرار شاورلي على الواد اللي في الصورة وقال لي ده معانا في الحزب... الكلام ده يوم 8 يوليو اول ما بدا نصب الخيام في سعد زغلول...وقتها ايفرونيا حصل معها المشكلة بتاعة المصريين الاحرار وانا كنت متابع من بعيد وعرفت المشكلة وحاولت اتدخل عشان اللي حصل عيب...رحت كلمت اللي في الصورة فشاورلي ع واحد من قياداتهم عشان اتفاهم معاه كل المطلوب انك تستفسري من حد في الحزب الواد ده تبعكم؟

موضوع تاني برضه متعلق بالفلول والامنجية:اول امبارح كنت بتكلم مع واحد في سعد زغلول وفي الاخر شكيت فيه لانه قال لي انه صحفي وبعيدا عن الطبقية بس مش منظر صحفي
وكان بيقول انه عضو في حملة دعم البرادعي واسمه على ما اظن محمد بسيوني...الراجل اللي اعرفه معرفة خفيفة بعد ما خلصت كلام معاه قال لي انه مرشد امن دولة فلو كنت موجود ولقيته حبلغ حد من الخيمة عشان يعرف شكله او يصوره بس اتاكدو لاني حاسس اني مرة حلاقي نفسي في صورة منهم

وفيه واحد تاني نفس الشخص قال لي عليه انه مرشد برضه وشفته كذا مرة كان مرة بيسخن ع قطع الطريق لو شفته حقول لكم برضه

اعتصام سعد زغلول

ده مجرد راي في اللي شفته النهاردة ي اعتصام سعد زغلول يحتمل الخطأ والصواب  للمنقاشة
بالنسبة لاعتصام سعد زغلول التصعيد مطلوب جدا مع حالة التجاهل من المجلس والحكومة بس لها اليات
يعني النداء اللي حصل في مايك من جمب خيمة التويتر لازم نصعد واللي عايز يطلع يقفل الطريق غلط وحالة المزايدة والتخوين اللي موجودة في تقسيم الناس اللي جوة يقول على اللي برة بلطجي ونكرة  والكلام على عبد الرحمن الجوهري اللي تجاوز كتير

واللي برة يقول ع اللي جوة عايز كراسي غلط كان لازم التصعيد يتم بالطريقة الاتية في رايي حشد بكمية اكبر من اللي موجودة بحيث يتم ملء الميدان جوة من غير ما يؤثر على العدد الموجود برة

  اي بانرات وتشيرتات لاحزاب وحركات متترفعش ولا تتلبس ويتم اجتماع بين المستقلين والمسيسين مرتين يوميا لبحث الاجراء التصعيدي ونتائجه والتنسيق 
مسيرات تبدأب50 شخص كل يوم في 3 مناطق مختلفة للحشدوالدعوة لتواجد الناس كل يوم كل حسب مقدرته 
تنسيق لاول اجراء تصعيدي قطع جزءي للطريق   
ويتم بمدة محددة اوبتحديد اغلاق حارات نهائيا ويكون فيه متطوعين من قبلها لتحويل المرور 
اما يبقى فيه دعم شعبي اكبر من كدة ممكن يبقى فيه اجراءات قطع كلية لطريق معين او تصعيد اكبر  كدة احنا بنختلف ونخون بعض واللي في الشارع بيتعاركو معاك بدل ما ينضمو لك او ع الاقل يؤيدوك

بلا غلوقية

مش ناوي اتكلم عن الداخلية ككل او تصرفات الظباط والأمناء عشان كدة حبقى مجبتش جديد 

التدوينة دي حتكون قدام حالة خاصة 

!!!حالة ضابط لسه كتكوت : حبلص

المفروض ان الأمور ده أول دفعته وقال لك انه الطالب المثالي

وده طبعا يبين لنا معايير اختيار أكاديمية مبارك للكلاب البوليسية لطلابهم المثاليين وهي

(1)
الطبقية والاستعلاء : بحيث يتضح لنا جليا أن ضباط الشرطة هم شعب الله المختار 
(2)
الوساخة وقلة الأدب : وهو الواضح في قصيدته ردا على رامي عصام
اهي

ياللي بتتريق علي البوليس اكيد انت اخو ابليس

بكره أبو دبوره و شورت و كا ب حيخلو عيشه اهلك هباب

مع ان الشورت ده مش لبسنا ده لبس اللي زيك من الكلاب

واقف ترقص و عامل فرحان و انت بتشتم اللي بيحرسوا الاوطان

لو كنت راجل بحق و صحيح ما كنتش غلط فينا و انت بتصيح

لكن الشرطه يبني حرقاك لانها دايما معلمه علي قفاك

اكيد انت حرامي فراخ او قعدت في يوم علي المنفاخ

مهما يبني تلف و تدور ضباطنا يبني نور علي نور

مهما تقول انت و جمال مروان اللي ابوه جاسوس و بتاع نسوان

جنفضل نحميكي يا مصر يا غاليه مهما قالوا عملاء الامريكان

و دي رساله مني ليك قبل ما تموت و تغمض عينيك

اتقي الله يا واطي في بلادنا دول ضباطها سيادك مش لعبه في ايديك

ماسك جيتار يا خسيس اش فهمك انت في البوليس

كبيرك تعاكس الحريم او تاكلك شويه برسيم

لكن تتكلم عن الرجاله دي واسعه عليك يابو رياله

العيب مش عليك يا فكيك ده عيب ابوك اللي نسي يربيك

لو دخلت الشرطه أي يوم حتهرب ملط من غير هدوم

الشرطه دي فخر و صيت و انشأها الفاروق يا عبيط

كفاياك يا بني تنطيط و اسرحلك ببيض و صميت

احنا عايزين اعتذار من الرجاله مش الرقاصين الزباله

لو غلط فيه اللي اسمه رامي أكيد حعتيره زي أي حرامي

مش عجبك مباحث الآداب أكيد ماما هناك يا كداب

عامه يا بني جاموس اللي زيك بيعبد الفلوس

اخر كلمه حقولهالك الحق شوف اللي حيجرالك

مع الوضع في الاعتبار طبعا ان العبط اللي مكتوب ده ولا اسمه قصيدة ولا شعر ولا حتى فيها اي حكم قافية
(3)
الغلوقية
والكذب المستمر وانه لامؤاخذة لازم يبقى ملوش كلمة
وده بعد ما اتفضح وحس انها كبرت منه رجع كسكس واعتذر 
ردا على ما اشيع فى الفترة الاخيرة حول قصيدة الطالب المثالى اللتى تناولتها الصحف مؤخرا و حق الرد مكفول لأى مواطن ان هذه القصيدة ليست من تأليفى ولا تمت لى بصلة ولا شاركت فى تأليفها وانما هى قصيدة وجدتها بمحض الصدفة على صفحات الفيس بوك و نقلتها على الصفحة الخاصة بى بحسن نية لكى اقرئها بنفسى وليس نقلى لها او احتفاظى بها يدل على اعجابى بهذا الكلام الذى يسىء لمغنى الثورة او البطل المصرى جمال مروان واتهامه بالجاسوسية و انا ايضا رافض لهذا الكلام وان الشرطة اسياد وغيره من الكلام القبيح , وأود ان انوه انى كطالب فى كلية الشرطة لا اعتبر نفسى سيد ولكنى مصرى احمل رسالة الامن من اجل الوطن والشعب , واوجه حديثى ايضا الى من رفضوا هذا الكلام رفضا تاما انى معهم لانى اتبع جهاز محترم و تربيت فى كلية اساسها احترام المواطن والسعى للتضحية بالروح من اجل الوطن ولا يصدر منا هذا الكلام لاننا بساطة مصريين ولكن نحمل انبل رسالة وهى حفظ الامن و القضاء على الفساد , واعتذر لكل من آلمته هذه القصيدة و اغضبته ولكنى لم اقصد كل ما يحدث الأن ولكنها كانت حرية التصفح والمشاركة فقط وبحسن نية."
وبعد ما اطمن ان الموضوع حيمشي سليم وفتح الوول متصور ان الناس بريالة حتصدقه وتطبطب عليه وتقول له ولا يهمك يا حبيبي
  لقاهم لسه بيشتموه قام رادد عليهم وقايل

طيب اذا كان ده أول الدفعة والطالب المثالي أمال الباقيين يعملو ايه؟

ولواحنا بنعترض على الظباط الموجودين دلوقتي وسياستهم في التعامل مع الناس

وده من أهم أسبابه انهم اشتغلو من صغرهم في ظل وجود قانون الطوارئ

طب الكتكوت ده بقى ايه نظامه؟

ملوش حد من عائلته أو اصحابه كان مشارك في الثورة

او على الأقل مؤيد لها؟؟

أو يمكن أبوه أو حد من قرايبه كان ظابط ولبس الطرحة ؟


في مقولة كنت مؤمن بها

 السلم يكنس من أعلاه

بس اتضح ان في الداخلية لازم يتكنس من فوق وتحت ويمين وشمال

 رسالة أخيرة لأخونا حبلص

ويمكن في الأيام الجاية
نعمل لك مولد وهدية
تلعب فيه بمسدس ميا
قال اسفين قال
بلا غلوقيــــــــــة

خالد سعيد مات مقتول

خالد سعيد مات مقتول
ومبارك هو المسئول
والعادلي هو المسئول

هتاف معروف كلنا قلناه ...النهاردة بيعدي سنة على وفاة خالد سعيد شهيد الطوارئ  ولسه مخدش حقه زيه زي كل المصريين اللي لسه مخدوش حقهم بعد 4 شهور من ثورتهم

ناس كتير بتقلل من حدث وفاته  باعتبار انه كان مدمن مخدرات وده ملوش تفسير غير انه محاولة لتسطيح الأمور وكإن الناس كلها ملايكة محدش فيهم بيغلط

انا معرفتش خالد الله يرحمه شخصيا وعشان كدة مقدرش اؤكد موضوع اللفافة أو انفيه بس اللي ناس كتير مش فاهماه ان مش دي القضية اللي احنا بنتكلم فيها...القضية هي ضرب وتعذيب شخص حتى الموت وده اللي مرفوض

ولنفرض ان خالد سعيد كان فعلا معاه مخدرات هل جوز المخبرين العتاولة مكانوش يقدرو يكتفو شخص جسمه قليل زي خالد ويروحو بيه القسم ومنها يترحل على النيابة وياخد جزاءه ؟
طبعا اجراء كان في منتهى السهولة  لكنه متعملش ليه؟

عشان اللي على راسه بطحة بيحسس عليها...الفيديوهات اللي صورها خالد الله يرحمه للظابط اللي بيسلك مصلحة أحراز   المخدرات عشان يطلع لنفسه هو واللي معاه سبوبة اتنشرت والناس دي اتفضحت وعشان كدة كان خالد لازم يختفى من الدنيا عشان الفضيحة تموت معاه

والأوسخ هو محاولة اقناع الشعب انه بلع اللفة اللي طولها 7 سم وقطرها 3 سم ...وكان بق البني ادم مننا في نفس حجم بق السيد قشطة

المشكلة الأكبر من وفاة خالد وغيره كتير هي الطرمخة والتعريص اللي كان ومازال في كل حتة...مشكلة شخص بيتحارب من نظام بوليسي كامل  حتى بعد ما مات ...تعذيب حتى الموت ...طب شرعي بتقارير مغلوطة قذرة يتحكم فيها أمن الدولة....قضاء معيوب
يؤجل العدالة لسنة كاملة وسط عدم وجود المتهمين أو اختفاء الأدلة أو غيرها  

حتى بعد الثورة التعذيب مستمر والطرمخة مستمرة والكذب مستمر والشرطة ديلها مش بيتعدل وشكله مش ناوي
تركيع لشباب مصري عند سفارة الصهاينة يوم 15 مايو وأقوال من نوعية انتو فاكرين انكم عملتو ثورة - دي بلدنا احنا وماضيين عليها مش بلدكم انتم -راجعينلكم وحننتقم منكم ياولود كذا وكذا وكذا ودلوقتي 

خمس ضحايا في أسبوعين بينهم وفيات ده ولسه هم مرجعوش بكامل قوتهم ...أمال لما يرجعو حيعملولنا إبادة جماعية ولا ايه بالظبط؟؟

خلاصة القول العيسوي محترم ونضيف بس شرابة خرج وبقاله 20 سنة بعيد يمشي ويا اما ييجي واحد قوي من الشرطة ويحترم ادميتنا ويحفظ الأمن في نفس الوقت وده مستبعد لانه جهاز قياداته كلها وسخة يا تجيبولنا واحد مدني له نفس الصفات وتتوفرله كل الصلاحيات  بالاضافة لرقابة ملزمة من منظمات حقوق انسان مستقلة لان القضاء والنيابة شكلهم بيقسمو مع الداخلية الغنايم 

ولا يزال التعريص مستمرا 

جبتك يا عبد المجيد تعينني

 قال لك يوم التدوين على النائب العام : قلنا ماشي ... دي بداية أول تدوينة ليا وجت في الراجل الطيب ده

قبل ما ندخل في الموضوع مش عارف ليه الصورة دي هي اللي بتتحطله دايما في

   الجرايد وكإن الناس بقى فرض عليها انها تشوف تكشيرته البهية دي 

 

مبدأيا عايز أطلع من  شماعة ان حسني مبارك هو اللي معينه عشان دي بقت نغمة
 مستهلكة شوية لإنه زيه زي أي قاضي أو رئيس محكمة كان بيعينه حسني بفضل
...الدستور الفرعوني اللي كان شغال بيه هو وطقم الترزية بتوعه 

ولا حقول اصله كان قريب محمود وجدي ولا نسيب معرفش مين عشان معنديش دليل على الكلام ده

أما أسباب رفضي لبقاءه في منصبه في منها قبل الثورة وفي بعد الثورة : تبدأ بفترة تعيينه كنائب عام سنة 2006 يعني في عز ما الفساد كان بينخر في عضم البلد وحكومة رجال الأعمال شغالة على الشعب بالأقلام والشلاليط وضرب فين يوجعك   يامصري

خد عندك كمان من ساعة ما اتعين لحد ما الثورة قامت مشفناش منه قرار عدل يمكن بس اعادة شحنة القمح اللي كان فيها حشرات اللي مصر استوردتها من روسيا في 2008 ...
 
فين بقى نتايج تحقيقات رشوة المرسيدس ؟ 
فوت علينا بكرة

طبعا مفيش حد في البلد كان بيجرؤ يظرف بلاغات في حسني والعائلة الملكية بس يعني اللي ما شفنا بلاغ اتحقق فيه وظهرت النتايج عن فساد أي وزير ... هو الشعب كان خايف يفتح بقه بس مش لدرجة ان مكانش فيه بلاغات بتتقدم في الحكومة يعني 

الأسباب دي كانت تخليه يوم 29 يناير يقدم استقالته لان كدة تاريخ الصلاحية انتهى 
ووقتها مكانش حد حيلاحقه قضائيا لانه مش هو اللي أفسد بطريقة مباشرة ...والا بقى كنا نعمل مقاصل فرنساوي لناس زي الجنزوري والكفراوي وأسامة الباز...ماهم كانو شايفين كل حاجة ومفتحوش بقهم غير بعد الثورة 

نيجي بقى بعد الثورة : سيبكم من شعب مصر كله اللي قعد يبوس فيه يوم ما اصدر قرار بدء التحقيق مع حسني مبارك ... شهر بحاله يا راجل مفيش بلاغ يتيم اتقدم في حسني وعيلته عشان تطلع قرار منع السفر وتجميد الأموال ؟؟
ده بعد التنحي بأسبوع كان في رصة بلاغات بالمستندات عليه هو والعائلة الكريمة

لا وكمان شهر عشان نبدأ التحقيق معاه

لا وكمان شهر ونص خناق ما بين الحاج عب مجيد ووزارة الصحة والداخلية
كل واحد يقول نقل حسني لطرة مش مسئوليتي  ونفضل بقى في الليلة دي الله اعلم
لحد امتى

كلامي خلص ومن النهاية  

GAME OVER
يا حاج عب مجيد
وخد معاك الملط والجمل

ملحوظة : كتبت التدوينة بدري عن معادها يومين عشان ظروف ممكن تمنعني  بكرة وبعده من اني الاقي وقت لكتابتها